Suit a gro mouvman jounen an, Konseye Prezidan Fritz Alphonse Jean, a travè yon nòt biwo kominikasyon l mete deyò, ankouraje pèp la kontinye fè youn ak fòs lòd yo pou kwape machin banditis la. 

Jodi madi 19 novanm lan se te yon jou kanpe goumen l te ye pou abitan Kanapevè, Boudon, Delmas 60, Miso pou n site sa yo sèlman. Lapolis t ap al entèsepte bonè nan maten yon kamyon ki t ap transpòte endividi ame ki t ap pran direksyon Petyonvil e endividi sa yo, anba presyon Lapolis, te gaye nan divès lokalite sa ki pral okazyone yon katafal mouvman *bwakale* jeneralize plis pase 30 moun, anba kolè pèp souvren, pase anba flanm kawoutchou. 

Se nan konjonkti sa Konseye Prezidan Fritz Alphonse Jean pa lantremiz biwo kominikasyon l mete deyò yon nòt pou ankouraje sitwayen yo kontinye kanpe nan bò fòs legal yo, bayo enfòmasyon k ap ede yo travay pi byen, ak soutyen nan konba pou retabli lòd nan katye yo. 

Ansyen gouvènè Bank Santral sou pouvwa Lavalas la dekonseye sila yo enstrimantalize yo kontinye nan move zak yo. Sila ki mare sosis yo ak malfektè tout plim tout plimay yo dwe konprann sa pat janm nan enterè yo men se nan avantaj sila kap batay pou kenbe tout privilèj yo anba men yo. 

Reprezantan akò Montana a rekonèt chay la lou e se ansanm n ap ka chanje sa, se nan fè yon sèl nap rive sove peyi nou tout bon vre. 

Èske konseye prezidan Fritz ankouraje bwakale a ?  

Eske pozisyon sa reflete pozisyon KPT a nan totalite li ? 

Èske se pa pawòl pou fè moun dòmi ?