Nan yon nòt pibliye vandredi 15 novanm 2024, Konferans Evèk Ayisyen yo (CEH) lanse yon lòt apèl kont vyolans k ap devaste peyi a. Yo eksprime endiyasyon yo devan nivo ensekirite ak zak kraze brize ki ap ravaje divès zòn nan peyi a, espesyalman nan zòn metwopolitèn nan.
Evèk yo denonse konpòteman dekilakyèl otorite yo, ki dapre yo, echwe nan fè fas ak kriz la. "Pa gen moun ki kapab aksepte yon sitiyasyon konsa. Bagay sa yo se rezilta zak ki kont plan Bondye ak diyite moun," yo deklare nan nòt la.
Yo mande dirijan yo ak tout sila ki gen enpak sou kriz la, kit yo gen zam kit yo san zam, pou pran responsablite yo. Evèk yo plede pou retablisman sekirite, respè lavi moun, ak rekonsilyasyon sosyal, pandan yo ensiste sou nesesite pou retabli otorite Leta nan tout peyi a.
Pandan y ap kontinye lapriyè pou peyi a, yo egzòte pèp la pou montre solidarite ak renmen, epi pou lapriyè pou lapè retounen ak jistis pou moun ki viktim yo.
Nap raple , depi fevriye, konjonkti difisil peyi a fòse evèk yo sispann reyini nan syèj yo nan Lilavwa, Kwadèboukè. Sitiyasyon sa moutre aklè gravite kriz la ak nesesite pou poze aksyon ijan.
